بداااية الكورس

بسم الله الرحمن الرحيم

أخيرااا هنبدأ كورسنا ... و ان شاء الله يا رب الكل يستفيد

قبل أي شرح هطلب منكم شوية حاجات كدة..

أول حاجة .. بالله عليكم تدعولي بظهر الغيب

تاني حاجة .. ياريت تحاولو تطبقوا كل اللي هيتم شرحه ان شاء الله .. لأن الشرح لوحده و حتى لو كان كويس مش هو اللي هيعلمك ،،،،لاااااازم تبطق

تالت حاجة.. ياريت كل اللي مشتركين في الكورس ده يضيفوا الميل ده galaxy.html@yahoo.com

عشان دايما ابلغكم بالمواضيع الجديدة .. و ان شاء الله هكون موجودة اون لاين كل يوم من الساعة 10 بالليل للساعة 11 عشان لو حد عايز يستفسر مباشرة عن أي حاجة..و لو مكنش في فرصة للسؤال المباشر ياريت تسألوا في المدونة هنا..

رابع حاجة.. انا و الله بتعب على ما بصيغ الشرح و بعمل الصور و برفع و كدة فياريت الاقي تعليق من اللي يقرا سواء عجبه الموضوع أو لأ بلاش يقرا و يمشي.

خامس حاجة.. للأسف عند بعض الناس المتصفح مش بيعرض الشرح زي منا عاملاه بالظبط و ساعات كمان بيكتب كلام غريب كدة في النص و حقيقي مش عارفة السبب .. عشان كدة بفضل ان الشرح تحملوه من الملف اللي هحطه كل مرة ... هو ملف PDF و مساحته صغيرة جدا يعني مش هياخد منك ثواني عشان تحمله.. و الفايدة في الاخر ليك ،، عالاقل يكون معاك الشرح سواء معاك نت أو لأ

سادس حاجة .. بعد كل درس هطلب منكم تاسك .. ياريت الكل يعمله ،، و يكون صادق مع نفسه بانه عمله .. و لو أي حاجة و لو بسيطة وقفت قدام أي حد ياريت يسأل و ان شاء الله كلنا نستفيد من الحاجات دي..

اخر حاجة ... ياريت الرد عالموضوع ده يكون اسم بس أو اسم مستعار من غير اي شكر و لا حاجات من دي عشان يكون أسهل اني أعرف مين معانا و أرصدهم..

***إن شاء الله الكورس هيبدأ خلال النهاردة او بالكتير بكرة .. و ان شاء الله هبلغ اللي هيضيفو الميل عن كل درس ..

في أمان الله...

مقدمة عن لغة HTML

بسم الله الرحمن الرحيم

لو انت عاوز تبدأ الكورس معانا من الاول اضغط هناااااا و ضيف تعليق انك عايز تكون معانا

مقدمة عن لغة ال HTML

ال HTML هي لغة بتستخدم في إنشاء صفحات الإنترنت وبالتالي مواقع الإنترنت المختلفة ، وهي من أسهل اللغات وأبسطها في المجال ده ، و كمان هي الاساس في بناء صفحات الويب .

قبل ما نبدأ حاجة في الكورس ، لازم نعرف الأول يعني ايه كلمة HTML

كلمة HTML هي اختصار ل Hyper Text Markup Language

و الكلام ده بالعربي يترجم كدة : لغة ترميز النص التشعبي ، أو لغة ترقية النصوص

دا كلام معقد طبعا و هنفكنا منه و نتكلم بصورة اوضح عن ال HTML

الـ Hyper Text هي الطريقة الخاصة بالتحرك علي صفحات الانترنت بالضغط علي نص معين اسمه (Hyperlinks ) و هي وسيله للتنقل لأي مكان في شبكة الإنترنت عن طريق الضغط علي الوصلات أو زي ما بنقول (اللينكات)

توضيح لحتة ال Hyper Text دي :

عارف مثلا لما اقلك اضغط هنا عشان تشوف الموضوع و يكون الكلام متركب على لينك لما تضغط عليه تلاقيك بتروح لصفحة تانية ... هو ده بقى المقصود بال Hyper Text .

مثال: اضغط هناااا

ال HTML مش لغة برمجة و دا لأنها:

1- مفيش فيها جمل شرطية (condition statement) اللي هي مثلا جملة if.

2- مفيش فيها جمل دوران (loop statement) زي مثلا while , for.

3- ملهاش مترجم خاص (compiler) .

ملحوظة: عشان نستخدم الجمل الشرطية او اللوب هنستخدم لغات تانية زي ال PHP و ال JavaScript

من مزايا اللغة دي انها مش مرتبطة بنظام تشغيل معين لأن متصفح الانترنت هو اللي بيفسرها و بينفذ التعليمات اللي فيها بغض النظر عن نظام التشغيل.

· هحتاج ايه عشان أبدأ اتعلم و انفذ ال HTML ؟؟؟

1- محتاج محرر نصوص زي ال NotePad مثلا ، و دا موجود عندنا كلنا.

2- محتاج برنامج تصفح انترنت زي Internet Explorer او Fire Fox او safari ، و دا برضو موجود عندنا كلنا.

بس يا سيدي مش محتاج أي حاجة تانية.

· دلوقتي هنشوف ازاي نبدأ انشاء ملف HTML عشان المرة الجاية نكون جاهزيين لأول درس فعلي في الكورس بتاعنا.

أول حاجة هتروح على قايمة Start و هتختار منها NotePad زي ما في الصورة.

ملحوظة: ممكن ميكونش النوت باد عندك من اول ما تفتح كدة ،، دور عليه في ال Start menu و اضغط عليها.

1- المفروض انك اما تفتحها تكتب فيها كود ال HTML و بعدين تحفظها بطريقة معينة .. بس احنا هنحفظها قبل ما نكتب حاجة (مش فارقة على فكرة).

بص في الصورة دي .. هتختار File و بعدين Save As…

3- بعد كدة هتظهرلك شاشة تحدد فيها مكان الحفظ و خصائص الملف اللي هتحفظه زي الشاشة اللي في الصورة دي:

لاحظ انك هتحفظ الفايل بامتداد HTML ،،، زي اللي فوق ده مثلا ... الفايل اتحفظ باسم galaxy.html

لاحظ كمان انك من Save as type هتحدد All Files

بعد كدة اغط Save و اقفل النوت باد و روح مكان منت حفظت الفايل و شوف هتلاقي ايه.

4- هتلاقي ان الملف اللي انت حفظته بقى بيفتح تلقائي من متصفح الانترنت زي اللي في الصورة دي:

شايفين .. الملف مبقاش يفتح نوت باد .. بقى يفتح صفحة انترنت ... و لو فتحتها هتلاقي صفحة بيضة ... طبعا عشان مكتبناش اي كود لسة .

5- علشان اقدر افتح النوت باد تاني عشان اكتب الكود اللي انا عايزاه هاجي على الملف بتاعي و اضغط كليك يمين و اختار Open With و منها اختار Notepad زي ما في الصورة دي:

بعد ما يفتح النوت باد هقدر اكتب الكود ... و كتابة الكود هنتعلمها ان شاء الله في كورسنا.

ملحوظة : ممكن تحمل الموضوع ده بصور كبيرة و شرح ألوان احسن من كدة من هناااااااااا

أشوفكم ان شاء الله في اول درس ... قريباااااااااا

ـــــــــــــــــــــــــــــــــــــــــــــــــــــــــــــــــ

أسألكم الدعاء ... في أمان الله